Փետրվարի 28-ին դեսպան Ալեսսանդրո Ֆերրանտին այցելել է Մայր Աթոռ Սուրբ Էջմիածին, որտեղ նրան ընդունել է Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը:
Հայոց Հովվապետը, շնորհավորելով դեսպանին Հայաստանում դիվանագիտական առաքելության ստանձման առիթով, նշել է, որ երկու ժողովուրդների բարեկամությունն ունի պատմական խորը արմատներ, որի ամրապնդման գործում այսօր էլ կարևոր դերակատարություն ունեն Հայաստանյայց Առաքելական և Հռոմի Կաթոլիկ Եկեղեցիների միջև ջերմ հարաբերությունները:
Հանդիպման ընթացքում Ամենայն Հայոց Կաթողիկոսը նաև նշել է Ադրբեջանի հետ հարաբերությունների, մասնավորապես՝ ռազմագերիների խնդրի և հայկական հոգևոր ու մշակութային ժառանգության պաշտպանության վերաբերյալ իր մտահոգությունները՝ ընդգծելով միջազգային հանրության հստակ դիրքորոշման կարևորությունը։
Իր հերթին, դեսպան Ֆերրանտին վստահեցրել է Նորին Սրբություն Հայրապետին, որ կգործադրի բոլոր ջանքերը՝ յուրաքանչյուր ոլորտում Իտալիայի և Հայաստանի միջև համագործակցությունն առավել խորացնելու և ընդլայնելու համար։
